Revelation of John 18
E Babilon Ni Ratapile
1Muri a matai tabua tara agelo i pe a hunu, i puru valai. I tahoka a nitora dagi. A bagetuanga vona i parai a malala, i ratea i palala hateka. 2 aI gale tala dagi hateka, i ta maea,“A tanga dagi e Babilon i vurua, i vurua pali!
Ngane i made vona kunana e huriki a hanitu,
a maka kadirovo hale,
a maka maki ri tegi ri hale.
3I bele maea, a vuhuna a tanga lobo na malala ri ninu vona
a naru vagole na moleanga vona, ri manga.
E huriki a hariki na malala ri mole turana.
E huriki a bakovi ni habi a maki ni gi kona, ri bole a moni dagi, a vuhuna i kona ne ria a maki i kupo, a vuhuna i ngaru ni tahoka a mahala i kupo.”
4 bMuri a longo tabu a lohona viri tara i ta valai na hunu, i ta maea,
“Mua e huriki a ngate nau, mu ha taroa a tanga iea,
ma mu gu ramai a naro hale vona,
mu gu bole a vuranga turana.
5 cA naro hale vona i lolo rike hateka, i padoi a hunu.
A Vure i uka ma i longo kaburungi.
6 dMu rata virihi ia, i manga a hini i rata virihi e huriki ranga.
Mu koli balaka rua a naro hale vona.
Mu guru puru na kikei na vain vona a vain i vagole hateka na vain i habi ne huriki ranga.
7 eI vakabagetu mule ia, i pitei na mahala dagi vona.
I mavonga, mu vakamadihia, mu ratea ge dedo.
Mu rata mavonga, a vuhuna i taki mulea, i ta maea,
‘Iau a hariki ngatavine. Iau, i uka ma a havuri.
I uka ma ge bele nau a vuranga, ga dedo.’
8 fI mavonga, a vuranga i kupo ge bele vona na parava i taku kunana.
A matenga, a nidedo, a vitoloa ge bele vona.
A kanono ge gutu parinea, ge lobo,
a vuhuna a viri i pelekadoa i gao hateka, ra Vure, a Bakovi Dagi.”
9 g“E huriki a hariki na malala, ra ri mole turana, ri vivi ni muri mai a ningaru hale lobo na kakaine ria turana, bara ri tangi, ri haloho na tahuna ri masia a pokona kanono vona. 10Bara ri mangenge na nimadihi dagi hateka i bolea, ri pesi basi, ri ta maea,
“‘Omo! O tanga dagi-o,
ra tanga kamumu e Babilon!
A Vure i pelekado ioe, o lobo maki tavula-o.’
11 h“E huriki a bakovi ri habi a mahala ni kona, ri tangi ngane. E rei ge kona ngane a mahala ne ria? 12 iE rei ge kona a gol, a silva, a kedo mata kamumu, a meki, a lavalava a mapana i dagi, a lavalava kuakua, a lavalava vururu ne ria. E rei ge kona a kai manginoro, a maki ni rata na togana elepen, a maki ni rata na kai a mapana i dagi, a maki ni rata na bras, a aen, a kedo padikuku ne ria? 13E rei ge kona a kulina kai manginoro ni kuku vona, a insens, a vain, a vel, a plaoa, a vit, a bulmakau, a sipsip, a hos, a karis, a vorakato. E rei ge kona ngane?
14“Bara ri ta maea, ‘A maki kamumu o ngaru hateka na hatemu ni bole, ngane i tabuli basi vomu. A maka mahala o vakabagetu mule ioe vona ri velu pali, i uka ma ni gi matai tabu!’ 15 jE huriki ri habi a maka maki nga ni kona, re huriki ri bole a mahala i kupo na tanga dagi iea, bara ri mangenge na nimadihi dagi i bolea, bara ri pesi basi, ri dedo, ri tangi maea,
16 k“‘Omo! A tanga kamumu-o,
e huriki ri made vona ri rodo a varakia kamumu hateka, a lavalava kuakua, a lavalava vururu.
O vakabagetu mule ioe na gol, na kedo mata kamumu, a meki!
17 lPali malaviriri kunana, a mahala lobo vona i lobo liu.’
“E huriki a bakovi ni vakanunu a sip, e huriki a taho dari, ra ri leho na dari, bara ri pesi basi, 18 mri tangi dagi, ri matanono mavonga a pokona tanga dagi iea, ri ta maea, ‘I uka tabu tara tanga ge kamumu manga a tanga iea.’ 19Bara ri dua, ri voro langa na gine ria a habulo, ri haloho, ri tangi dagi, ri ta maea,
“‘Omo! A tanga kamumu-o!
E huriki a tahona aga
ri bole a mahala i kupo vona!
Pali malaviriri kunana i vurua, i ngeki.
20 nMua e huriki mu made na hunu, mu vivi!
Mua e huriki a tara na Vure, e huriki a apostolo, e huriki a propet, mu vivi,
a vuhuna a Vure i ratapilea a tanga iea, a vuhuna ri rata hale mua!”
21 oMuri a agelo hateka i bole rikea a kedo dagi, i manga a kedo ni ubi vila a vit vona. I bolea, i voro purua na dari, i ta maea,
“A tanga dagi e Babilon tara, ni gi voro puru hale,
i uka ma ni gi matai tabu.
22 pA nangina gita, a pinoli, a tavure, a kalova
i uka ma ni gi longo tabu pololilo vomu.
E huriki a mari ni rata a maki
i uka ma ni gi matai tabu pololilo vomu.
A nangina kedo ni ubi vila a vit
i uka ma ni gi longo tabu pololilo vomu.
23 qA nipara
i uka ma ge parai tabu ioe.
A lohona bakovi a ngatavine ru parangi karaba
i uka ma ni gi longo tabu pololilo vomu.
E huriki a bakovi vomu ni habi a maki ni kona, ri dagi hateka ne huriki lobo na malala,
o tami e huriki lobo na malala na muto vomu.
24 rPali a Vure i matai pololilo vona a darane huriki a propet, e huriki a tara na Vure,
e huriki lobo ni rabalaki na malala.”
Copyright information for
BNP